كين .. الرحّالة الملهم ..!

شغف شخص اخر نحو المعرفة ممكن انه يولد فيك الكثير من الطاقه والكثير من الالهام .. لما تشوف شخص فيه شيء من طاقات الطفوله ، هذيك الطاقه وهذاك التفكير الي يخلي مننا أشخاص شغوفين ونتسائل ونستفسر عن كل شيء جديد علينا .. ممكن تشوف نفسك لما كنت طفل بعقل شخص كبير ومااعرف كيف أشرحها لكم الا عن طريق هذي القصه الي بحكيها ..

البراء العوهلي .. الطالب أو “الموثّق” السعودي في اليابان .. يعيش الآن فيما يسميه بالفصل الخامس من حياته ، في هذا الفصل قرر أنه يعيش نمط حياة تتمحور حول ثلاثة مجالات (السفر – الرياضة – تعلم اللغات) وكانت اليابان هي المحطة الأولى في هذا الفصل من حياته .. وهذا حسابه في السناب تشات :

 

كين ، صديق للبراء .. قصته جميلة ونظرته للأشياء بطريقة مختلفه ألهمتني بشكل كبير .. بكتب “الستوري” او القصة من حساب البراء في سناب تشات كتابةً وحاولت تكون حرفية من لسان الأخ براء لكني عدلّت عليها للتوضيح أكثر وكتوثيق بسيط للشخص هذا الي ألهمني بطريقة تفكيره المختلفه للأشياء والجميلة بنفس الوقت ..

أسم هذا الشخص كين ، عمره ٤١ سنة .. من تخرجه من الثانوي مااشتغل وظيفة رسمية يشتغل شهور بسيطة بارت تايم بعدها يسافر سنه او سنتين او ثلاثه ، وخلال سفراته يبحث عن وظيفة عشان يقدر يغطي احتياجاته الأساسية وبنفس الوقت .. يكتب كتب ، فكل سفرة لها عنوان ، مثلاً أحد سفراته كانت لنيويورك جلس فيها سنه ونص كان يشتغل بمطعم مع أقليّة مكسيكية فمنهم تعلم اسباني ، وكان يشتغل معهم وعاش معاهم وكتب كتاب كامل عن الأقليات الأسبانية .. ففكرته إنك تسافر سفرة وأنت حاط فبالك هدف أو موضوع معين للسفرة وايش بتستفيد منها أو بتنتج منها تعطي طعم ومعنى ثاني للسفر ..

*من الأشياء الي تكلموا فيها : بعمر الواحد وعشرين أخت كين أهدت كين كتاب لكاتب أسمه (هوندا) كان هذا الكتاب إسمه “منطق المظلوم أو المقتول” والكتاب كان يتكلم عن كيف تفكر بعقلية الطرف الآخر وإيش كانت وجهة نظر الشعوب تجاه الحروب أثناء وقوعها زي مثلاً وش كان وجهة نظر اليابانيين لما كانو بحرب مع أمريكا وايش وجهة نظر الأمريكان لما كانوا ضمن حربهم مع اليابان ، فالكتاب يتكلم عن كيف تفكر بالطرف الآخر ويخليك تفكر من “منظور” الطرف الآخر . ” < أتمنى له ترجمة ^^”

وهذا الكاتب “هوندا” من أحد الكتّاب المؤثرين في الثقافة اليابانية ، وكان  مختص بموضوع الكتابة والتأليف و”الاستكشاف” بشكل خاص وكان مستكشف درجة أولى ، أول الكتب الي نشرها كان بأيام الثلاثينيات وكان عبارة عن رحلته لشمال كندا مع الإسكيمو والثانية مع الناس الي يعيشون في الأماكن المرتفعة ، والثالثة للسعودية مع البدو .. أسلوب هذا المستكشف بالكتابة وطريقة توثيقة لحياة السعوديين بتفاصيل كثيرة من صور وأماكن ألهمت كين كثير ، ومن خلال هذا الإلهام صار عنده الإهتمام أنه يزور السعودية ..

كين يمتلك ألبومات لكل رحلة يزورها ومن ضمنها ألبوم للسعودية .. فتح للبراء الألبوم وقاموا فيه يتبادلون الصور ويعطيه الذكريات ويكتب جمب كل صورة تفاصيل التفاصيل من وقت وسالفة وسعر الاكل وموثّق السعر بالريال مقارنة “بالين” الي هي العملة اليابانية ، حتى بعض أفراد العوائل الي صورها أخذ منهم شجرة العائلة وكاتبها جمب الصور .. توثيق عجيب وأول الكتاب كاتب رقمه لما كان بالسعودية .. الألبوم كأنه وثائقي عن السعودية بعيون يابانية ! زار تربة وبريدة والدوادمي والرياض والبطحاء في الرياض ، ومصور في البطحاء لوحة مكتوب عليها بلهجات متعددة من الهند نفسها وراسم خريطة جمب اللوحة الي عالصورة كل كتابة وين مكان هذي اللهجة في الهند على الخريطة !

مصور مكان الدركسون في السيارة انه عاليسار ، مصور سعر البانزين انه ارخص من الموية !

راح للبادية وقضى فيها خمس أيام .. وبجانب انه كاتب الشجرة العائلية للشخص الي جلس عنده بالبادية مسوي ملخص بسيط او رسم توضيحي كيف وصل للقرية هذي يعني كيف وصل للشخص صاحب الخيمه المسمى “ابو علي” !

من خلال شخص أسمه سيرجي وهو شخص اسباني التقى فيه بكندا ، سيرجي عرّفه على شخص اسمه سلطان وسلطان عرّفه على صدام ، وصدام عرفه على طلال وطلال يعرف ولد ابو علي وعن طريقه وصل للبدو .. وهكذا مع كل مكان يزوره يكتب كل شخص وصله لمين ..!   *مو متأكده من إسم صدام بس كذا زي ماسمعت*

مصور صورة وكاتب عليها تعليق ابو علي لما قاله الحين خذ صوره وانا أقلب الخبز !! لأنه مايمتلك فيديو عالكام فكاتب التعليق كتابة عالصورة ..

يقول البراء : طريقة توثيقه للتفاصيل يتلذذ بكل شي جديد وغريب عنه ، يقول انه كان يتطلّع انه يزور السعودية وكيف غيرت نظرته عن كثير من الاشياء  ، جلس يفكر من وجهة نظر الأشخاص الي هنا فيقول في السعوديه مافي شي يجي عبث .. كل شي له أصل ديني ، عقدي أو تاريخي ..!

ويقول : كين سألني سؤال جداً جميل يقول : أكيد في أشياء كثيرة تعتز فيها كونك تنتمي لبلدك أو مجتمعك لكن ايش الاشياء الي تضايقك ؟ واستنتج هذا الشيء حسب ماهو لمَس وأيضاً من كتاب هوندا الي كان يقول بكتابه أن السعوديين عندهم فخر عالي بالنفس على العكس عند أغلب اليابانيين الي دائماً عندهم جلد للذات ، وبالاخير السؤال مو هدفه المقارنة بين شعبين لأنه مافي أحد يعرف ايش الصح .. بس هدفه انه وش الاشياء الي تضايقني بمجتمعنا ، فوصلنا لنقطة العنصرية الي هي للأسف موجودة بداخلنا حتى لو كانت لاتُبدى على الشارع لأنه بينظر لها نظرة ثانية ، وأحيانا مانفكر انها عنصريه خصوصاً بتعاملنا مع المقيمين في بلدنا فأنا *البراء* جداً أحترم الي يعامل المقيمين من خدم وسائقين بنفس درجة الإحترام لأي مواطن من أبناء بلدة .. يعني فكرة اني أحسن منك أو أعلى منك عشان اسم عائلتي أو جنسيتي أو مذهبي أحياناً فكرة جداً سيئة خصوصاً أنه ما كان لك ولا للطرف الاخر أيّ يد بإختيار هذا الشيء ..

************

 بالنهاية : ممكن موضوع التدوينة مايعني لك شيء ، وممكن انه يكون ولا شيء ك”قصة” .. بس كونك تطالع شغف شخص بمكان أنت عايش فيه ويلاحظ أشياء كنت تعتبرها من روتينك اليومي وكيف هالأشياء شكلت ذهول بالنسبة لعقله ! الموضوع يخليك تفكر أنه كيف تحاول تطور عقلك من هالناحية وكيف تبدأ ترجّع عقلك زي لما كنت طفل تلاحظ كل شيء وكل ملاحظة تعتبرها مهمة وفريدة نوعاً ما ، غير عن التجربة الاستثنائية الي راح تجربها للأشياء مستقبلاً إذا فكرت بنفس هذي العقلية بأماكن جديدة ، وممكن بعض الأماكن تتجدد بعقلك إذا بديت تشوفها من منظور ثاني أو بروح ثانية كروح هذا المستكشف .. أنه يكون لك هدف بنظرتك للأشياء ويكون لك هدف بكل مكان تزوره .. أشوف أنه شيء سعيد وملهم جداً ..!