قائمة المفضلات .. للحياة ..

في جلسة قراءة لديوان شعري جميل .. لقيت قصيدة شدتني .. شدتني كثير وألهمتني معانيها وحذاقة ورتابة وزنها ومعناها .. وقتها قررت اني اضيفها بيني وبين نفسي لقائمة الأشياء المفضلة عندي بالحياة ، الشيء الي خلاني أفكر .. كيف الشخص يبني القائمة الجمالية الخاصة فيه ..! وكيف ذوقنا أو تذوقنا للأشياء بدأ ..! وليه صار الي يعجبك يعجبك ؟ ذوقك ومزاجك كشخص متفرّد بنفسك كيف صار ..! وهل له أساس أو هل يعتمد على قاعدة معينه ؟ ولا يختلف حسب تاريخك كشخص وكثرة الأشياء الي طالعتها / سمعتها / تذوّقتها بحياتك ؟ 

 من هذي التساؤلات بدأت أبحث .. 

في علم الإجتماع يعرّفون الذوق على انه نمط الإختيار الفردي للشخص وطريقة تفضيله للأشياء .. وكلمة الذوق تعبّر عن أشياء كثير من ضمنها الستايل ، الأخلاق ، السلع الإستهلاكية والأعمال الفنية وهذه الأشياء . (ويكيبيديا) 

ولو أفكر “بصوت عالي” بقولك ، أنت كشخص الأشياء الي تعجبك تحسها حتى لو ماعجبت الكل أشياء جميلة وحلوة بعينك ، زي اغنية تطربك لحالك او نوع معيّن من الأفلام مايحب الي حولك يشاهدونه بينما هو نوعك المفضل ، ذوقك بالأكل ، باللبس ، بالأشخاص الي تحب تطالع يومياتهم مثلاً ، والقائمة تطول .. 

هل فكرت يوم تطالع نفسك بعين شخص مختلف عنك بالذوق ؟ تحكم على حياتك وتذوقك للأشياء وتسلخ روحك تماماً وتصفّر ذوقك وتحكم على أي شيء إنه جميل فقط لأنه يعجب شخص آخر ..! 

أساساً هل فيه ذوق جيّد وذوق سيء ؟ أعتقد الحكم بحد ذاته يعتبر تحيّز لذوقك الشخصي .. خصوصاً لما يجي الموضوع للفنّ ، الكل يحمل ذائقته الشخصية والمقدسة بالنسبة له .. 

دائماً لما يجي النقاش لهذا الموضوع يقال : خليك متفرّد ، ولا يعجبك مايعجب الناس وبس .. لا تصير إمّعه ومالك رأي .. طيب كيف ابني ارائي ؟ ونظرتي وذوقي الخاص ..! 

ماراح أفترض اني شخص فاهم وأقول اني أعرف كيف نتعلم هذا الشيء الحسّي البحت .. وفكرت أخلي الموضوع مفتوح للنقاش وأخليه كفكرة أزرعها بمخ أي شخص يقرأ تخليه يعيد التفكير بقائمة مفضلاته إذا كانت موجودة ، بالأغاني بالأفلام بالفنّ الي يشاهدة وبشخصيات الناس الي يخالطهم .. اشياء تخليك تحلل نفسك وتستفسر أنا من أي صنف من الناس بالذوق ، اذا كان فيه تصنيف معيّن ..!

تذكّر أنه بالتذوق وباختياراتك الفنيّة بالحياة دائماً مافيه صح أو خطأ قد مافيه انه هذا الشيء الي اخترته يشبعّ عينك ؟ يغذّي سمعك أو يلهم بصرك ..! ويشبهك ؟ هنا خلاصة الموضوع .. وهذا مايلغي انه الفن هو شيء يخلي قلبك يكبر .. يملأك من جوى وتحسه يشبع أحساسك .. 

لكن الأكيد ، لاتهمل هالقائمة ، وخليها شيء ترجع تتغذى منه .. وتذكّر انه مو لازم تكون متفرّد عشان يكون ذوقك جيّد ومختلف .. ممكن يعجبك ما قد يعجب أي شخص إلى حد ما لكن حاول تاخذ من وقتك لنفسك .. وتجرّب وتكتشف أنواع مختلفة من الفنون .. ولما يعجبك نوع معيّن تعمق فيه ، وابحث عنه عساس تغذّي روحك دائماً بالجمال من إختياراتك الخاصة فيك ، وبجمالك الي منه تصنع عالمك .. وأوقاتك اللذيذة ..